Top News

លោក ជិន ប៊ុនធឿន អភិបាលខណ្ឌឬស្សីកែវ រួមនិងក្រុមការងារ ចុះពិនិត្យវឌ្ឍនភាពការងារសាងសង់សាលាឆាន់ និងជួសជុលសាលាបឋមសិក្សាគោកត្របែក ខេត្តកំពង់ធំ ក្រោមការឧបត្ថម្ភដ៏ថ្លៃថ្លាពីថ្នាក់ដឹកនាំជាន់ខ្ពស់ សម្តេចទាំងទ្វេ !


ខេត្តកំពង់ធំ ៖ នាថ្ងៃសៅរ៍ ទី២៩ ខែសីហា ឆ្នាំ២០២៦ លោក ជិន ប៊ុនធឿន និងក្រុមការងារ បានបន្តចុះពិនិត្យដោយផ្ទាល់លើវឌ្ឍនភាពនៃការសាងសង់សាលាឆាន់វត្តគោកត្របែក និងការជួសជុលកែលម្អសាលាបឋមសិក្សាគោកត្របែក ដែលស្ថិតនៅភូមិគោកត្របែក ឃុំស្រឡៅ ស្រុកតាំងគោក ខេត្តកំពង់ធំ។ ការចុះត្រួតពិនិត្យផ្ទាល់នេះ ធ្វើឡើងដើម្បីធានាថាដំណើរការសាងសង់ហេដ្ឋារចនាសម្ព័ន្ធទាំងពីរប្រព្រឹត្តទៅដោយរលូន ស្របតាមស្តង់ដារបច្ចេកទេស និងអាចឆ្លើយតបនឹងតម្រូវការជាក់ស្តែងរបស់ប្រជាពលរដ្ឋក្នុងមូលដ្ឋាន។

គម្រោងសាងសង់សាលាឆាន់ និងការជួសជុលកែលម្អសាលាបឋមសិក្សានេះ សម្រេចទៅបានក្រោមការឧបត្ថម្ភគាំទ្រដ៏ថ្លៃថ្លាបំផុតពីសំណាក់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត តាមរយៈការយកចិត្តទុកដាក់ និងសម្របសម្រួលផ្ទាល់ពីសំណាក់ ឯកឧត្តម ឌី វិជ្ជា និងលោកជំទាវ ហ៊ុន ម៉ាណា។ ការយកចិត្តទុកដាក់នេះ គឺជាកាតាលីករដ៏សំខាន់ក្នុងការជំរុញការអភិវឌ្ឍមូលដ្ឋានឱ្យមានការរីកចម្រើនជាលំដាប់។

ការសម្រេចបាននូវសមិទ្ធផលទាំងនេះ គឺពាក់ព័ន្ធយ៉ាងជិតស្និទ្ធទៅនឹងទស្សនវិស័យនៃការអភិវឌ្ឍសង្គមដែលយក ពុទ្ធចក្រ និងអាណាចក្រ ដើរទន្ទឹមគ្នា។ ពុទ្ធចក្រ គឺជាអាណាចក្រនៃព្រះពុទ្ធសាសនា ដែលតំណាងឱ្យវិស័យស្មារតី សីលធម៌ ចរិយាធម៌ និងការអប់រំដុះដាលបញ្ញាស្មារតីរបស់មនុស្សម្នាក់ៗឱ្យចេះប្រកបដោយសេចក្តីត្រឹមត្រូវ។ នៅក្នុងបរិបទសង្គម និងវប្បធម៌ខ្មែរ ព្រះពុទ្ធសាសនា មិនមែនគ្រាន់តែជាកន្លែងសម្រាប់បំពេញតម្រូវការជំនឿអរូបី ឬការធ្វើបុណ្យទានតាមប្រពៃណីប៉ុណ្ណោះទេ ប៉ុន្តែគឺជាឫសគល់ដ៏រឹងមាំបំផុតក្នុងការទ្រទ្រង់ព្រលឹងជាតិ ផ្សារភ្ជាប់សហគមន៍ និងជាគ្រឹះបណ្តុះបណ្តាលស្មារតីសប្បុរសធម៌ដល់មនុស្សគ្រប់ជំនាន់។

ការស្វែងយល់ពីអត្ថន័យដ៏ស៊ីជម្រៅនៃពុទ្ធចក្រ គឺការមើលឃើញពីតម្លៃអប់រំដ៏អស្ចារ្យដែលផ្តោតលើការគ្រប់គ្រងឥរិយាបថផ្លូវកាយ វាចា និងចិត្ត។ តាមរយៈការអនុវត្តតាមធម៌វិន័យ និងការប្រណិប័តន៍តាមគន្លងធម៌ មនុស្សម្នាក់ៗរៀនសូត្រឱ្យចេះលះបង់នូវអំពើអាក្រក់ ភាពអាត្មានិយម និងការប្រកាន់បក្សពួក ដោយជំនួសមកវិញនូវព្រហ្មវិហារធម៌ទាំងបួនគឺ មេត្តា ករុណា មុទិតា និងឧបេក្ខា។ ធម៌ទាំងនេះហើយដែលដើរតួនាទីយ៉ាងសំខាន់ក្នុងការរក្សាសណ្តាប់ធ្នាប់សង្គមដោយប្រយោល ព្រោះបុគ្គលដែលមានសីលធម៌ខ្ពស់ នឹងមិនប្រព្រឹត្តអំពើខុសច្បាប់ ឬបង្កផលប៉ះពាល់ដល់អ្នកដទៃឡើយ។
វត្តអារាម ក្នុងន័យនេះ បានក្លាយជាមជ្ឈមណ្ឌលអប់រំក្រៅប្រព័ន្ធដ៏មានឥទ្ធិពលបំផុតក្នុងសង្គមមូលដ្ឋាន។ ចាប់តាំងពីសម័យបុរាណរហូតមកដល់បច្ចុប្បន្ន វត្តអារាមមិនត្រឹមតែជាទីសក្ការៈបូជាសម្រាប់ព្រះសង្ឃគង់ចាំព្រះវស្សា និងបំពេញសមណកិច្ចប៉ុណ្ណោះទេ ប៉ុន្តែថែមទាំងជាថ្នាលបណ្តុះបណ្តាលអក្សរសាស្ត្រ វប្បធម៌ ប្រពៃណី និងជាកន្លែងផ្តល់ការប្រឹក្សាយោបល់ផ្លូវចិត្តដល់ប្រជាពលរដ្ឋដែលជួបការលំបាកក្នុងជីវភាពរស់នៅ។ គ្រប់ពេលដែលសហគមន៍មានបញ្ហាប្រឈម វត្តអារាមតែងតែជាទីពឹងដ៏កក់ក្តៅ និងជាកន្លែងប្រមូលផ្តុំសាមគ្គីធម៌ដ៏ធំធេង។ ទន្ទឹមនឹងនេះ សាលាបឋមសិក្សាគោកត្របែកដែលត្រូវបានជួសជុលកែលម្អឡើងវិញ ក៏ជាកន្លែងបណ្តុះបណ្តាលចំណេះដឹងទូទៅ និងវិទ្យាសាស្ត្រ ដែលបំពេញបន្ថែមយ៉ាងស័ក្តិសមបំផុតទៅនឹងការអប់រំសីលធម៌ពីវត្តអារាម។

ទន្ទឹមនឹងនេះដែរ គោលគំនិតនៃការដឹកនាំឱ្យពុទ្ធចក្រ និងអាណាចក្រដើរទន្ទឹមគ្នា គឺជាយុទ្ធសាស្ត្រអភិវឌ្ឍន៍សង្គមដ៏មានតម្លៃប្រកបដោយចក្ខុវិស័យឆ្ងាយ។ អាណាចក្រ តំណាងឱ្យអភិបាលកិច្ច ការកសាងហេដ្ឋារចនាសម្ព័ន្ធរូបវន្តដូចជា សាលារៀន ផ្លូវថ្នល់ និងការអនុវត្តច្បាប់រដ្ឋ ចំណែកឯពុទ្ធចក្រ តំណាងឱ្យការអភិវឌ្ឍធនធានមនុស្សតាមរយៈការបណ្តុះបណ្តាលក្រមសីលធម៌ គុណធម៌ និងស្មារតីស្នេហាជាតិ។ ការអភិវឌ្ឍតែផ្នែកសម្ភារៈដោយគ្មានការអប់រំផ្លូវចិត្ត និងសីលធម៌ទ្រទ្រង់ អាចនឹងនាំឱ្យសង្គមធ្លាក់ក្នុងភាពវឹកវរ ឬការបាត់បង់តម្លៃមនុស្សធម៌។ ផ្ទុយទៅវិញ វិស័យទាំងពីរនេះត្រូវតែដើរទន្ទឹមគ្នា និងបំពេញបន្ថែមឱ្យគ្នាទៅវិញទៅមក ដើម្បីធានាបាននូវនិរន្តរភាពនៃការអភិវឌ្ឍសង្គមជាតិ ។

គួររំលឹកផងដែរថា // កិច្ចខិតខំប្រឹងប្រែងក្នុងការសាងសង់សាលាឆាន់ និងជួសជុលសាលាបឋមសិក្សានៅឃុំស្រឡៅ ស្រុកតាំងគោក ខេត្តកំពង់ធំ ក្រោមការឧបត្ថម្ភគាំទ្រពីថ្នាក់ដឹកនាំជាន់ខ្ពស់ គឺជាសក្ខីភាពបញ្ជាក់យ៉ាងច្បាស់អំពីការប្តេជ្ញាចិត្តខ្ពស់ក្នុងការថែរក្សា និងលើកកម្ពស់តម្លៃព្រះពុទ្ធសាសនា និងការអប់រំជាតិ។ ហេតុការណ៍នេះមិនត្រឹមតែជួយឱ្យកូនចៅប្រជាពលរដ្ឋមានទីកន្លែងសមរម្យសម្រាប់បំពេញកុសលផលបុណ្យ និងសិក្សារៀនសូត្រប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ក្នុងការរក្សាឱ្យបាននូវស្ថេរភាព លំនឹង និងសុខដុមនីយកម្មសង្គម ដែលជាគ្រឹះដ៏រឹងមាំសម្រាប់ភាពរីកចម្រើន និងកិត្យានុភាពរបស់ប្រទេសជាតិយើងតរៀងទៅ ៕

✍️អត្ថបទ: ដួង អក្ខរា

Post a Comment

أحدث أقدم

ទំនាក់ទំនងតាមSocial Media